【明報專訊】噚日會展衣香鬢影，政總高官包括特首梁振英(CY)、政務司長林鄭月娥、財爺曾俊華等，兩個前特首候選人唐英年、何俊仁同場現身，更有前律政司長黃仁龍同黃夏蕙同場合照！政、商、學術、影藝視界大人物聚首一堂，政治光譜仲極其廣闊，為乜？原來係中文大學社會科學院副教授沈旭暉小登科呀。

政商學術影視大人物齊到賀

沈教授同Bonnie吳凱霖噚日中午喺中大崇基禮拜堂行禮，由聖公會大主教鄺保羅主持，教授一早喺facebook自稱宅男，唔多鍾意social，講定黃昏喺會展辦酒會將請「公職朋友」，而晚宴只請「相熟朋友」，Emily單純地分析婚宴賓客名單，CY係沈教授嘅「公職朋友」，而港視王維基、特首辦主任邱騰華、政制局長譚志源以至副局長劉江華，都係沈教授「相熟朋友」。

晚宴高潮係播放唐英年夫婦拍片大談夫婦相處之道。唐太郭妤淺寄語新娘要對老公好，做太太仲要「有危機感」！唐唐就叫沈教授要有修養，因為世界有好多騙子，仲要小心「語言偽術」。嘩，呢餐飯有料到呀！

網民﹕號召力勁過西環

一對新人特登印咗3000本《隨緣家書》送畀賓客，載有佢哋隔空對論短文50多篇同好多相，全書196頁；而噚日嘅座席安排亦離唔開國際政治舞台，每圍皆以地名為名，菜單仲有「亞洲共同體」嘅八寶紅茶，同埋「巴峇海潛龍」嘅清蒸東星斑。

噚日出席名人之多，有網友就喺教授個fb度話，佢個婚禮勁過娛樂版蔡加讚汪圓圓嘅豪華婚禮，號召力仲勁過西環𠻹。