【明報專訊】港大同中大兩間醫學院為本地培訓咗唔少女醫生，佢哋仲搞咗個女醫生協會，但係幾低調。食物及衛生局副局長陳肇始(Sophia)同Emily提起，最近去協會搞嘅晚宴，大讚班女醫生做事認真，連參加晚宴前嘅醫學講座都好投入，好熱烈討論問題，8點幾鐘仲未肯收科開飯，有來賓笑住細聲講﹕「咁晏仲未開席，有啲肚餓𠻹。」

傾醫學傾到唔願開飯

Sophia話班女醫生做嘢好專業，搞晚宴節目都好認真，負責表演嘅醫生用普通話唱咗幾首藝術歌曲，聽得出經過認真操練，唱得有板有眼，唔係打「天才」波。Sophia做過港大護理學院院長，同班女醫生分屬半個同行，大家幾啱傾，佢仲坐到曲終人散。