盧瀚霆呂爵安稱小組團綜助感情昇華 姜濤醉酒席地而睡 李駿傑圓夢爆喊

盧瀚霆呂爵安稱小組團綜助感情昇華姜濤醉酒席地而睡李駿傑圓夢爆喊

[2025.05.05] 發表

【明報專訊】MIRROR成員姜濤、盧瀚霆(Anson Lo)、呂爵安(Edan)和李駿傑(Jeremy)，率先獲公司安排以分拆小組「妹豬組」拍團綜，於ViuTV節目《呂濤米Lo Seoul》齊齊到韓國捱眼瞓接受各項挑戰，當中讓觀眾見到呂爵安即使疲累亦無放棄影隊友「黑圖」，吃貨Anson Lo投訴伙食未合心水，姜濤飲醉酒席地而睡，還有李駿傑圓夢爆喊，完全拋開「偶包」展示真實一面。Anson Lo、呂爵安和李駿傑覺得此行令4子感情昇華，姜濤則笑言沒有降低過，何來昇華，還稱去到韓國心繫其他8成員，每晚都好辛苦。

記者：林祖傑

攝影：劉永銳

姜濤、Anson Lo、呂爵安和李駿傑到韓國10日拍團綜，異口同聲大呻行程最辛苦是不夠瞓，呂爵安說：「過往都試過分小組拍團綜，但今次正式首次12個變成4個去拍，本身我們鍾意的都很類同，又幾鍾意韓國，所以不太當是工作，去到之後發覺原來真係工作，比想像中緊密好多，每日瞓得三四個鐘，好誇張，每次一上車全部即刻瞓，不過都好好玩，好似和朋友去旅行，只不過平時唔會咁早起身。」

李駿傑打war game險暈

李駿傑首日拍攝已睡眠不足見暈，「因為坐凌晨機冇瞓覺，一去到已經要即刻化妝即刻玩，打war game要好多郁動，踎低好耐，突然間起身就好暈，好在前面有個桶畀我扶住」。姜濤取笑李駿傑當時勁似孕婦。呂爵安稱今次「妹豬組」旅程中發生了極多極度有趣及驚喜的事，有很多令他們反應不到的事情，「在節目大家會見到好多我們4個人平時的相處，真的很真性情，完全冇任何包裝，平時點樣講嘢，點樣互相趷嚟趷去，大家會見到從來未見過嘅畫面同狀態，極度推介一定要睇，我真心覺得會好睇好笑」。身為「黑圖」愛好者的呂爵安，凌晨搭飛機已開始影隊友黑圖儲貨，3拍檔知道後均十分驚訝。Anson Lo稱無此癮，李駿傑笑說：「仲有力氣影，佢(呂爵安)真係好有心機做呢啲嘢。」

攰到無胃口品嘗美食

Anson Lo強調在當地沒有喪食，亦已戒了食兩個飛機餐，「𠵱家盡量食少啲，今次我們的食量屬正常，食啲嘢又唔係好好食，好多時一個鍋裏面有隻雞，就成餐食隻雞，對我來講好似很少選擇，不過這也關乎個人喜好」。

姜濤稱對他而言，每餐都只是維持生命，因為真的很累，「又不是說不好吃，只因太累，根本冇力去品嘗。加上韓國的食物款式都差不多，沒有很多選擇，所以都是食完立即上車瞓，去下個目的地繼續拍，今次拍攝時間真的由朝到晚，安排了很多環節給我們，算是我們拍過這麼多次綜藝節目最辛苦」。他稱最辛苦是呂爵安，因為要靠對方帶動氣氛。

喜獲崔始源導遊參觀SMTOWN

Anson Lo表示旅程中最難忘是到韓國娛樂經紀公司SMTOWN，驚喜見到K-pop界大前輩崔始源現身帶4人參觀，還有傾心事和詢問對方心得，覺得很奇妙。李駿傑透露去完SMTOWN一度感動爆喊，「因為以前長期幻想會入到這一間公司，18歲時有去過海外面試，還去過兩三次，之後發現曾和姜濤同一日去，多年之後，以MIRROR身分踏入這間公司，覺得好神奇，用第二個身分入到去都好吖！」姜濤稱當年16歲，抱着嘗試的心態去面試，只試過一次，所以沒有李駿傑這麼感觸。

Anson Lo李駿傑喪玩機動遊戲

節目中4子獲安排接受不同挑戰，Anson Lo說：「我和李駿傑好鍾意玩機動遊戲，好耐都冇試過可以喪玩，又唔使排隊，雖然我們都有玩，但只得我們兩個enjoy。」當中最不enjoy是畏高的姜濤，直認玩機動遊戲時差點心跳率爆表，「最驚就是玩過山車，還有要揸真飛機，Anson Lo和李駿傑有機會嘗試親自駕駛飛機降落，我在地面看時，見到降落得不是幾平穩，好像差點會發生意外，原來是機師允許他們這樣做，我當然冇，上到去淨係夠膽坐響度，只和機師講『safe』」。可有想過怎樣克服畏高？姜濤說：「畏高唔需要克服，覺得冇咩必要克服，其實我主要驚離心力」。

姜濤驚青燒棉花糖認唔夠man

姜濤在節目燒棉花糖時，表現非常驚青，被經理人黃慧君(花姐)鬧不夠man，他說：「只是節目效果嚟，真係冇諗過段片會流出。」李駿傑幫姜濤澄清，說其實是熱氣好勁，難以伸手去燒棉花糖，姜濤才一路燒一路嗌，他也要一直包住隻手不夠man。姜濤笑道：「多謝，唔使特別去解釋，好小事，唔緊要，係我唔夠man！」酒量淺的二人在鏡頭前現醉態，李駿傑自覺好失態，因為平時好少飲酒，但又好想試燒酒加啤酒，不過對他來說的確很易醉。同樣飲醉酒的姜濤說：「返到房，唔知自己響度講乜，響地下瞓咗一陣先至去冲涼。」

不斷傾偈交流加深了解彼此

Anson Lo稱他們這個組合結伴去旅行，不會有嗌霎，「我們鍾意嘅嘢都好似，好多嘢都會話冇所謂，去邊或食咩都會話是但啦」。他認為今趟旅程絕對會令「妹豬組」友情昇華，「就算鏡頭後，私下相處好多，對大家更加了解」。呂爵安亦認為今次4子一齊去旅行體驗不同環節，相比平時一起工作大不同，「要不斷一齊傾偈、交流、玩，絕對會提升我們的關係」。李駿傑表示旅程增加了他們的共同回憶，「這個節目剩係得我們4個，唔關嗰8個事，也可以分享給他們聽」。姜濤笑言：「響我心目中沒有降低過，何來昇華兩個字，去到韓國我都係牽掛住其他嗰8個，所以每一晚都好辛苦，心諗如果有佢哋8個響度，呢件事係幾咁美好。」

服裝：Farfetch (盧瀚霆、李駿傑)、Bathing Ape(姜濤)、Mr Porter(呂爵安)

造型：PIPA Creative

化妝及髮型：Rainbow Chung、Mayling Suen@Annie G.Chan Makeup Centre、Denny ku、Man Chan、Lydia Yung @Chic Private I Salon、Percy Shing

■更多娛樂猛料 ﹕ol.mingpao.com