【Emily】警隊po演習相 「爆肌」阿sir搶fo
【明報專訊】第15屆全運會沙灘排球項目測試賽周日喺維園完成,警方等部門噚日就喺維園嘅場地做重大事故及反恐演習。警方發放嘅演習相片入面,有一張非常搶眼,有個渾身肌肉、手瓜現青筋嘅軍裝警員用手槍狀物體指住被制服喺地嘅「犯罪分子」。有網民見到呢位阿sir肌肉幾乎迫爆制服,留言問喺問係咪荷李活動作演員「The Rock」狄維莊遜嚟咗做警察。
演習有警方、全國運動會香港賽區統籌辦公室、消防處、民安隊及醫院管理局等多個部門參與,模擬沙灘排球賽事期間賽場內外發生唔同程度嘅重大和反恐事故,警察行動部、爆炸品處理課、機場特警、東區警區、港島總區行動部等人員出動,展開疏散及緊急救援。警方話會檢討緊急事故應變計劃,為11月舉行嘅全運會準備。