【Emily】獻計滅赤 陳仲尼一拳滅尺
[2025.02.15] 發表
【明報專訊】民建聯立法會議員陳仲尼噚日中午喺金鐘向市民派朱古力金幣，佢話政府多次提及財赤，已對營商信心產生負面影響，又話財政司長陳茂波提過要幾年時間恢復財政平衡，但一直無具體計劃，希望政府清晰公布滅赤路線圖，講清楚點樣增加收入同縮減開支。
陳仲尼拎住寫上「財尺」嘅尺同算盤等道具去金鐘，即場用手打斷「財尺」，而向途人派嘅「金幣」部分用比特幣同博彩籌碼設計，寓意政府應多方面開源，包括新增體育博彩項目，並加快推行以港幣計價、用多元資產作為抵押物嘅穩定幣，推動金融創新。
滅赤方面，佢話政府過去8年嘅經常開支增加56.4%，而外匯基金近年有超過2000億元投資收入，但回撥機制仍停留喺2007年前嘅機制，認為喺當前形勢下，政府應檢視回撥機制，前提係唔影響外匯基金保衛聯繫匯率嘅功能。
更多港聞
【明報專訊】政府噚日宣布，2026年1月1日至12月31日會做人口普查。呢次人口普查有新措施，只會抽大約一成人口做「長問卷」，其餘九成人唔使...
詳情
相關新聞
