【Emily】創港史Gwulo網 貝大衛獲大英勳章 「文物保育付出」獲肯定 話多得義工
[2025.01.01] 發表
【明報專訊】英國政府新年前夕公布新一批授勳及榮譽名單，其中香港歷史存檔網站「Gwulo」創辦人貝大衛(David Bellis)獲頒大英帝國勳章(British Empire Medal，圖)，表揚佢對「香港文物保育的付出」(services to Heritage Preservation in Hong Kong)。
David同Emily講，對獲嘉許感到喜出望外，同時開心所有付出得到認同。佢特別提到，網站主要係靠好多義工，先有今日嘅成就，希望佢哋都分享呢份光榮。
貝大衛本身喺英國威爾斯出生，1989年首次來港，1992年正式定居。佢喺2009年開始經營收藏香港歷史圖片嘅網站「Gwulo」，取其廣東話「古老」同音。佢今年離港返英，「Gwulo」就繼續營運落去。David話𠵱家住嘅地方同繁忙嘅香港好唔同，一方面掛住香港好多嘢，同時老家都有新嘅風景探索，兼可以享受同家人一齊嘅時光。
匯豐祈耀年獲封爵士
另外，退任匯豐集團行政總裁嘅祈耀年(Noel Quinn)獲封爵士(knight bachelor)，讚辭提及祈耀年喺匯豐任職37年，積極同英國政府合作，支持英方環境、社會及管治責任嘅措施。下次見到Noel，就可以叫聲Sir喇。
更多港聞
【Emily】居星掛住港燒鵝 沈祖堯盼退休後「歸根」
【明報專訊】中文大學前校長沈祖堯近日從新加坡返港，去咗明愛醫院同醫護分享佢喺獅城嘅所見所聞。除咗講起當地醫學教學，佢仲大談「星洲覓食記」，話... 詳情
【明報專訊】食環署噚日宣布推出《滅鼠約章》，邀請私人住宅大廈及屋苑、房協、過渡房屋、資助出售房屋、租置計劃屋邨嘅物管公司、業主立案法團同居民...
詳情
相關新聞
