【Emily】食環推約章 邀大廈委滅鼠大使
[2025.01.01] 發表
【明報專訊】食環署噚日宣布推出《滅鼠約章》，邀請私人住宅大廈及屋苑、房協、過渡房屋、資助出售房屋、租置計劃屋邨嘅物管公司、業主立案法團同居民組織簽署，參與者要承諾6項工作，包括委派一至兩人擔任「滅鼠聯絡大使」，負責統籌屋苑或大廈內嘅防治鼠患工作。
參與者仲要做常規巡查，喺住宅或大廈內提供清潔同清理垃圾行動；採取防鼠措施；監察所聘用嘅防治蟲鼠服務承辦商表現；妥善保存防治蟲鼠工作嘅紀錄；向居民宣傳防治鼠患信息。
食環署話參與者同時可以獲得「回饋」，例如由署方頒發《滅鼠約章》證書及標貼、由署方免費提供防治鼠患嘅技術支援，亦可以獲邀參與署方舉辦嘅防治蟲鼠講座，參與機構同處所嘅名單都會上載到食環署嘅專題網頁，以示肯定咁話。食環署就會視乎首階段經驗，考慮擴展至其他業界。
更多港聞
相關新聞
