【Emily】「利迷」陳克勤收禮 獲高普球員簽名波衫
[2024.12.25] 發表
【明報專訊】民建聯主席陳克勤係資深「利迷」，今年佢就收到份窩心聖誕禮物，由遠在英國嘅好友送上一件2022年英格蘭足總盃決賽中，利物浦正選11人加上前教頭高普嘅親筆簽名波衫。當日利物浦同車路士互射十二碼，以6比5捧盃。
至於點解鍾意利物浦，佢話因為利記會奮戰到最後一刻。佢以2019年歐聯四強賽事為例，當時利物浦首回合作客西甲球會巴塞，以0比3落後，返到主場嘅次回合以4比0反勝晉級，最後仲喺決賽勝出。
陳克勤話正正係呢份永不言棄嘅球隊精神，唔單止令佢一直與球隊同行，一齊經歷高山低谷，連佢自己面對困難和挑戰時都會同自己講，唔到最後唔好放棄。今年利物浦由史諾領軍，英超聯賽榜暫時居首，作為擁躉，陳克勤話無論最終結果係點，佢都會繼續支持愛隊。
更多港聞
【明報專訊】啟德體育園明年首季開幕，近月園內各場館陸續舉辦測試賽同演練，其中最多容納5萬人嘅主場館，終於迎來第一項測試活動，下月5日（星期日...
詳情
相關新聞
