【Emily】修復麥徑出分力 漁署召喚山友運料上大帽山

[2024.12.24] 發表

【明報專訊】大家去行山，一定踏足過漁護署鋪設嘅山徑，但大家有無諗過可以出一分力，共同建設山徑？漁護署嘅「香港郊野公園」社交媒體專頁，噚日就公開召喚有氣力嘅山友，幫手喺聖誕節期間搬運山徑物料上大帽山，用嚟維修麥理浩徑。

專頁呼喚有力氣山友幫忙，由聖誕日(25日)到下月11日期間，行山經過鉛鑛坳上大帽山時，將物料由鉛鑛坳搬上去標距柱M138附近，路段大概要上行320米，拎物料處同搬完放低位置都會有指示，而要拎嘅物料唔算好重，每袋約一兩公斤，呢啲物料可以畀郊野公園嘅師傅用嚟修復山徑。

睇番專頁上嘅短片介紹，用嚟建山徑嘅物料，主要係木塊、碎石及泥，師傅會用嚟砌梯級同改善山徑排水。專頁話如果大家幫到手就真係唔該晒，仲提醒山徑大家都有份，叫大家行山時記得「行正路，護步道」。

更多港聞

【明報專訊】聽日聖誕節，個人資料私隱專員公署嘅關愛義工隊趁住節日去到聖雅各福群會灣仔長者地區中心，為約200名長者舉行聖誕防騙聚會，送上禮物... 詳情

【明報專訊】由全國政協副主席梁振英（CY）喺2012年牽頭推動成立嘅齊心基金，近日喬遷之喜，由茘枝角進駐炮台山。基金上星期舉行開幕禮兼成立1... 詳情