【Emily】官場音樂椅轉動 教局副秘料掌廣播處
[2024.11.30] 發表
【明報專訊】今年陸續有資深政務官夠鐘退休，官場音樂椅又再轉動。政府噚日公布，環境局常秘謝小華明年1月2日開始退休前休假，由現任廣播處長張國財接任；康文署長劉明光下個月4日都開始退休前休假，將由現任財庫局副秘書長陳詠雯接任。至於邊個接任廣播處長，Emily聽聞會由教育局負責學校發展及行政科嘅副秘書長杜永恒接任，延續近年AO做處長嘅做法。
兩名行將退休嘅高官喺官場30幾年，公務員事務局長楊何蓓茵讚揚兩人任內貢獻，祝願佢哋退休生活充實及愉快，其中提及謝小華喺新冠疫情期間親自督導污水監測計劃，為制訂防疫措施提供重要數據。楊太又讚揚劉明光任署長期間，喺確保體育同文化場地策略規劃、穩定供應及健全管理方面擔當重要角色。
至於新調職嘅兩個官員，張國財1993年10月加入政府政務職系，今年4月升為首長級甲級政務官(D6)；陳詠雯就1995年9月加入政務職系，今年4月晉升為首長級乙一級政務官(D4)。
更多港聞
相關新聞
