【Emily】鐵路展勾童年回憶 林世雄仲記得火車滷水味

【Emily】鐵路展勾童年回憶林世雄仲記得火車滷水味

[2024.04.19] 發表

【明報專訊】港鐵噚日舉行紅磡站「站見」鐵路展開幕禮，運輸及物流局長林世雄致辭時話，細細個時每日都好期待爸爸喺長沙灣放工後，買火車上嘅齋滷味返屋企，佢話唔係成日都食到，但到𠵱家仲記得嗰陣滷水味，在場嘉賓同議員聽到都哈哈大笑。佢又話自己對呢個展覽特別有感情，事關自己住喺大埔超過60年，平時主要都係搭東鐵進出九龍。

林世雄又提到，柴油機車、第一代電氣化火車「黃頭」列車，同前年退休嘅12卡「烏蠅頭」列車，象徵鐵路發展嘅里程碑，亦標誌住科技發展同技術進步為鐵路營運帶來嘅革新同提升，更係陪伴大家長大嘅「老朋友」。

港鐵主席歐陽伯權其後同林世雄參觀展覽，睇晒3架退役列車，行到月台嗰陣，佢哋兩個仲一齊「打卡」，對住熒幕扮鬼扮馬，由電腦將佢哋個頭key落去卡通車站職員度。