【Emily】車主司機留意 6月底前續牌收費不變
[2024.02.15] 發表
【明報專訊】《財政預算案》本月28日公布，政府雖然話財赤，要研究加收費，但無講邊項服務要加價。不過，運輸署已做定措施，話為免市民喺預算案發表前趕向各運輸署牌照事務處遞交續牌申請，實施特別安排，容許符合指定要求嘅車主同駕駛者，可以喺6月底或以前按現行收費續牌。發言人話相關安排同財政預算案無任何關係，形容「運輸署亦不知悉關於《財政預算案》的內容」。
翻查資料，運輸署最早自2005年，喺每年預算案公布前都有特別換領牌照安排，但相關收費並非每年調整。運輸署又話，所有喺預算案發表日或之前合資格換領嘅車輛牌照，即係6月27日或之前牌照期滿而仍有登記嘅車，可以喺6月27日或之前任何時間按現行收費為牌照續期4個月或12個月。
至於正式駕駛執照及駕駛教師執照，同樣喺預算案發表日前合資格換領嘅話，即6月27日或之前期滿、喺換領時期滿不足3年，可以最遲6月27日按現行收費換領執照。
更多港聞
相關新聞
