【Emily】德總領館介紹卡通龍 象徵希望友誼環保
[2024.02.14] 發表
【明報專訊】今年係龍年，唔少人都討論東西方龍嘅唔同形態，德國駐港總領事館就喺facebook介紹喺德國家傳戶曉、受大人同細路歡迎嘅卡通龍塔巴盧加(Tabaluga)。
話說形象可愛嘅塔巴盧加由德國音樂家Peter Maffay創作，1980年代初首次出現，代表希望、友誼同環保。卡通片中主角塔巴盧加為保護家園Grünland(英文為Greenland)免受邪惡冰王Arktos侵襲，同一眾伙伴展開旅程。總領事館話，呢段冒險旅程提醒每個人都有能力積極啲咁影響身處嘅世界。
德國駐港總領事張德林(Stefan Bredohl)都有入鄉隨俗，跟咗中國國術龍獅總會一嘗舞龍嘅簡單舞步，見佢拎住龍頭率領一行人舞高弄低，都有少少功架。張德林話學完舞龍後動力十足，又用廣東話拜年：「祝大家新年快樂，恭喜發財。」
更多港聞
【Emily】大埔情人節夜市 設「放閃」打卡位
【明報專訊】特首李家超早前宣布「日夜都繽紛」，各區民政事務處都牽頭大搞夜市等活動。今日係情人節，大埔藝術中心噚日提早開始搞「心願夜市」，放有... 詳情相關新聞
