【Emily】垃圾徵費在即 議會新慣例惹質疑 議員互送禮 包裝多被指浪費
[2024.02.13] 發表
【明報專訊】農曆新年期間親朋戚友會互相送禮，一眾立法會議員亦然，唔少過年前互相向對方嘅議辦送賀禮。議員送出嘅禮品相當多元化，除咗較普遍嘅年糕、賀年小食，亦有人送金龍擺設、瓷製茶杯等。有議會中人私下同Emily慨嘆，垃圾徵費將實施，議員嘅禮品唔少都用咗大量包裝，造成浪費，部分禮物亦唔多實用，都唔知點樣處理先好。
據Emily了解，各議員今年互相送贈嘅禮物款式多元，有議員送出南棗核桃糕、手切臘腸、爆谷、腰果食品，亦有人比較傳統，例如選委界何君堯就送年糕。另一邊廂有議員別出心裁，其中選委界林筱魯送出一件金龍擺設連利市封，民建聯郭玲麗就送上瓷製嘅茶杯。
議員趁農曆新年互表心意，係客氣友好表現，以Emily所知都係新一屆立法會「愛國者治港」之下嘅新慣例，有議會中人私下就話，垃圾徵費推行在即，議員可推廣環保，減省非必要包裝，又認為部分禮物唔係好實用，希望大家避免造成浪費咁話。
更多港聞
【Emily】過年抄牌 一哥：盡量酌情唔一刀切
【明報專訊】警務處長蕭澤頤早前提過農曆新年期間「抄牌」會酌情處理，而近日部分地方仍然有違泊車輛被發告票。警方喺前年共發出超過336萬張「牛肉... 詳情
相關新聞
