【Emily】財會通過22.8億「嬰兒獎金」撥款 狄志遠唯一反對
[2024.01.20] 發表
【明報專訊】去年《施政報告》提出向每個合資格嬰兒嘅父母派發一筆過兩萬元「新生嬰兒獎勵金」，立法會財委會噚日通過22.8億元相關撥款。新思維狄志遠反對撥款，佢批評措施無助提高生育率，質疑當局慷慨「派利市」，但就削減社福界開支。
新生嬰兒獎勵金撥款以67票贊成、1票反對、1票棄權下通過。投反對票嘅狄志遠質疑現時政府財政困難，派錢22億元相當於11年社福開支，認為將資源投放喺其他範疇更幫到基層。政務司副司長卓永興反駁，話社會普遍有訴求希望推出獎勵金，反問係咪政府財政緊張，新一份《財政預算案》就唔使推出措施。
尚海龍棄權 指歧視新移民
選委界尚海龍就投棄權票，佢認為措施歧視新來港人士，認為非永久居民嘅新來港人才都應獲獎勵金。卓永興強調絕無歧視，現時做法係同公屋等政策睇齊。
經民聯梁美芬發言時就分享自身經歷，「我自己就生兩個，係兩年抱兩，覺得一定要兩個先完美」。佢引述家計會早年宣傳口號「一個嬌，兩個妙，三個吃不消，四個斷擔挑」，大讚宣傳入腦，「入腦到我哋長大成人，做埋教授，遲婚嘅，都覺得生兩個先係好」。
更多港聞
【明報專訊】民建聯上月中做消費者信心指數調查，訪問咗802人，結果3項指數全部下跌，包括「目前狀况指數」、「消費者預期指數」、「綜合消費者情...
詳情
【明報專訊】今個月底任滿嘅中文大學醫學院院長陳家亮未卸任已有新去向，佢下禮拜三（24日）起將出任醫務委員會委員，接替即將退休嘅醫委會主席劉允...
詳情
相關新聞
