【Emily】陳健波口頭報告 尚海龍話漏point
[2023.12.02] 發表
【明報專訊】上年12月經補選加入立法會嘅選委界議員尚海龍(圖)，至今上任近一年，不時因唔熟悉議事規則或運作而「語出驚人」。噚日立法會內務委員會開會，由選委界議員陳健波報告由佢擔任主席嘅《2023年道路交通法例(提升個人化點對點交通服務)(修訂)條例草案》及《的士司機違例記分條例草案》委員會報告，但該委員會成員尚海龍就話報告有遺漏，未提及佢同其他議員關注嘅「統一call車app」內容。
內會主席李慧琼隨即解釋，每個委員會主席喺考慮報告時，都會盡力將最大多數議員嘅意見總結成發言稿，並提醒大家，委員會主席之後都會有份書面報告，涵蓋更多內容，惟口頭報告未必涵蓋到每個議員特別關注嘅內容。陳健波都話有份相當多頁嘅詳細報告，包括其他意見。至於有關嘅條例草案就排期到12月13日(周三)，即本年度最後一次立法會大會上恢復二讀及三讀。
更多港聞
【Emily】中環10米聖誕樹亮燈 提早報佳音
【明報專訊】踏入12月，街上聖誕節氣氛漸濃。冠君產業信託旗下嘅中環花園道3號今年舉辦大型戶口聖誕社企市集，現場仲有一棵10米高嘅巨型聖誕樹，... 詳情相關新聞
