【Emily】愛滋病毒測試宣傳車巡迴各區

[2023.12.02] 發表

【明報專訊】為響應噚日嘅世界愛滋病日，衛生署安排愛滋病毒測試服務宣傳車今個月到訪各區，以插畫同遊戲等方式講解愛滋病傳播途徑、預防方法，同做測試嘅重要。車內亦有平板電腦展示「HIV測試服務」新網站嘅兩個功能，包括網上預約輔導及測試服務，同埋自我檢測套裝訂取服務。

衛生署話，本港嘅愛滋病病毒感染呈報個案由2015年高峰725宗，回落至去年409宗；同期新增個案介乎每年62至139宗，當中超過八成患者確診愛滋病病毒感染後3個月內發病，衛生署提醒及早識別同治療，可有效避免發病同其他併發症。

衛生署又提醒，曾有不安全性行為嘅人應及早接受抗體測試，高風險群組要定期檢測，曾有性行為都應該最少檢測一次。宣傳車以「為健康、做測試」為題，費用全免亦毋須預約，參加者仲有機會獲發紀念品。

更多港聞

【明報專訊】踏入12月，街上聖誕節氣氛漸濃。冠君產業信託旗下嘅中環花園道3號今年舉辦大型戶口聖誕社企市集，現場仲有一棵10米高嘅巨型聖誕樹，... 詳情