【Emily】張秀賢被指四周欠債 「苦主」開群組
[2023.01.27] 發表
【明報專訊】前學民思潮成員張秀賢前年辭任元朗區議員後轉趨低調，政圈曾傳佢陷入財政危機。財經KOL「渾水」喺網上撰文，唔點名話有前區議員以唔同名義借錢，例如籌選舉經費、家人住院費等，但同時又去旅行同花費，「受害者」涵蓋「左中右」，近期該前區議員更派「基本法乜乜研究中心」嘅卡片，影射有人「已變節」。文章刊出後有人組成「苦主群組」。
張無否認欠債 否認「變節」
張秀賢接受Emily查詢時無否認欠債傳聞，只係話部分說法不實，詳情就唔方便多講。佢話「人生難免做錯好多事，最緊要識返轉頭」，並就此致歉，話「希望用行動證明番」。被問到有無派某基本法研究機構嘅卡片，佢話：「變節論係無中生有，不作回應，政治立場係點，日月可昭。」
有說該前區議員可引見新民黨葉劉淑儀，葉太噚日回應話曾見過張秀賢兩次，唔清楚佢個人事務，「我同佢唔係好熟」。
不過網上愈來愈多「債主」現身，例如移英嘅政治學者黃偉國話，該前區議員前後借咗佢26萬元，相信超過20人受影響。創作人Kit Man亦喺facebook話，舊年張秀賢搵佢同漫畫家「阿塗」搞中秋月餅禮盒，之後對方找數一拖再拖，「兩批月餅我同阿塗一蚊都未收過」。學者王慧麟則轉發「渾水」文章話，政界債主唔會公開，因為「咁樣揚出去，會畀對方陣營恥笑」，有朋友「就咁樣哽咗去，跌咗幾十萬」。
噚晚有人發現，有名為「張秀賢」嘅人以「基本法學生中心」名義撰文，話要更好回應習近平講話嘅期望。該中心由前特首董建華特別顧問葉國華創辦嘅基本法基金會成立。
更多港聞
【Emily】教大5議員校友話當年 郭玲麗難忘「不做經師」訓誨
【明報專訊】5名同係香港教育大學校友嘅立法會議員朱國強、陸瀚民、郭玲麗、林振昇及楊永杰，最近喺教大刊物《超越教育》分享昔日校園點滴。教師出身... 詳情
相關新聞
