【Emily】卸人大常委有新職 譚sir：無諗係咪退休
[2023.01.25] 發表
【明報專訊】全國人大常委譚耀宗(譚sir)早前宣布，出於年齡考慮會退任常委，外界關注今年已73歲嘅佢係咪諗住從此退休。譚sir接受有線新聞訪問時就話，退任後會有新崗位，最近做咗全國港澳研究會副會長，日後可能都會有好多工作，舉例話好似兩年幾前兩名前特首董建華同梁振英搞「香港再出發大聯盟」，都搵咗佢做秘書長，有需要搵佢嘅都希望盡量幫忙，無諗係咪𠵱家就退休。
譚sir又回顧擔任人大常委嘅經歴，話呢5年經歷反修例事件 ，中央出「連環拳」訂立《港區國安法》同修改本港選舉制度，最近仲做埋國安法釋法，佢好安慰每件事都係為咗香港利益、社會穩定長治久安，仲話記得國安法通過當晚，有班年輕人拎住束花、拉橫額迎接佢返港，令佢好感動，即使畀美國制裁都無遺憾。
有人認為中央對香港管治愈收愈緊，譚sir就話唔可以主觀咁話收緊，因為本身國安法同《基本法》入面都有相關限制，而當中央對香港信心增加，有啲事可能會唔同。
更多港聞
【Emily】許願節X漢服日主題攝影 市民樹下拋寶牒 著傳統服樹前留影
【明報專訊】大埔林村喺今個農曆新年復辦「香港許願節」，大批市民噚日年初三到林村許願樹廣場拋寶牒祈福許願，希望新一年行好運。除咗許願節，噚日同... 詳情相關新聞
