【Emily】撞正防疫放寬 民記工展會拉大隊試飲
【明報專訊】一年一度舉行嘅工展會1月1日就會結束,最近都有唔少政界人士把握機會掃貨,幫手做宣傳,噚日就到民建聯拉大隊喇,Emily見到佢哋一袋二袋健康食品,仲拎住一盒盒寫住「感冒清熱」、「藿香正氣水」嘅中成藥合照;最近新冠疫情又再爆發,唔知佢哋有冇乘機入貨補倉呢。
民建聯主席李慧琼、副主席陳勇同埋幾個立法會議員去工展會,搵埋廠商會會長史立德、副會長盧金榮等人一齊參觀購物。佢哋先去新設立嘅「經典懷舊玩具區」參觀,之後就去咗唔同攤位了解吓銷情,好似去煤氣公司睇下用智能應用程式控制嘅爐具,然後就去咗掃貨喇。議員林琳就同網民分享,話自己買咗啲麵同零食,返到屋企仲即刻煮嚟食𠻹。
早前因應防疫條例放寬,工展會都重推試飲試食,見班議員幾乎個個都拎住支「青BB」嘅嘢飲,佢哋都有試飲埋一份喇。Emily聽講支嘢飲好似係有柑桔味道,柑桔本身有維他命C,啱晒大家最近要強身健體啦。