【Emily】港鐵站名書法字 現身兔年車票
[2022.12.29] 發表
【明報專訊】嚟緊仲有唔夠一個月就到農曆新年，港鐵會推出「港鐵兔年賀年車票」套裝，今年嘅車票唔單止有兔仔公仔，仲係首次以港鐵車站名中文書法字為主題，真係夠晒標誌性。車票套裝包括兩張車票、一個精美票套同埋8個兔年利市封；其中一張有「兔」字書法嘅車票，就係由退休港鐵建築師區傑棠創作；而兔仔插畫就由本地年輕藝術家彭康兒設計，下個月1號(星期日)就有得買喇。
區傑棠過去曾經為多個港鐵車站名揮毫潑墨，今次佢就創作兔字書法，仲話好高興可以參與港鐵嘅賀年生肖車票創作，紀念車票除咗有搭車功能，仲可以作為藝術品收藏。港鐵香港客運服務總監楊美珍就話，今次合作係展示中國書法同現代插畫嘅聯乘，為賀年生肖車票系列注入新元素，推動傳統藝術普及。
另推新春抽獎 送388張全年票
唔止有賀年車票，港鐵仲推出「新春賞 全年免費搭」抽獎，有388張全年車票。詳情瀏覽港鐵網站或者港鐵App。
更多港聞
相關新聞
