【Emily】圖書館節今開鑼 回顧60年故事
[2022.10.08] 發表
【明報專訊】香港第一間公共圖書館喺1962年設立，到今年啱啱一個甲子，喺10月8日至11月27日舉行嘅「香港圖書館節2022」就會以「喜閱同行六十載」做主題，將會透過多媒體互動展覽、講座、文藝節目、網上活動，回顧公共圖書館60年來嘅故事。
圖書館節重點節目《圖書館再發現》多媒體互動展覽，會由10月29日至11月20日喺香港中央圖書館展覽館舉行。展覽分為6個體驗區，將藝術同科技結合，用多媒體互動裝置，例如光雕裝置、電子互動牆、影像感應等，畀市民回顧圖書館不同時代嘅轉變、了解圖書館多元化資源同服務。
其他精彩活動就有由本地作家米哈、一樹主持嘅「喜閱共享」網上讀書會，同讀者分享閱讀與生活嘅關係；仲有「悅讀情懷」手藝工作坊，畀參加者學習製作香薰蠟牌掛飾同埋皮革等小手工；另外亦有一系列同生活相關嘅專題講座。
更多港聞
相關新聞
