【Emily】啟田邨長者屋將撤舍監 鄧家彪促保留

[2022.08.30] 發表

【明報專訊】申訴專員公署主動調查房屋署長者住屋，噚日截止收集意見，工聯會立法會議員鄧家彪同觀塘區議員簡銘東向申訴專員發公開信，讚長者屋有價值，「宜優化、勿取消」，又提到兩人跟進嘅藍田啟田邨啟旺樓長者住屋，目前住客跌至17人，房署通知將取消舍監服務，舍監維持至11月30日，兩人促請保留舍監。

當一型設計長者住屋只得20戶以下，房署就會取消舍監服務。房署回覆證實，啟旺樓長者屋剩番17戶長者，12月1日起取消舍監服務，會將單位內緊急警報警鐘連接至24小時保安控制室或大廈入口處保安櫃台，確保長者緊急服務唔受影響；長者可選擇調遷至有舍監嘅二型或三型設計長者屋。

兩人信中提到啟旺樓長者屋大部分長者都80至90幾歲，經過舍監持續辦活動後凝聚力好強，舍監幫手買餸、煮餸、餵藥；批評取消舍監如奪走長者「家人」同照顧者，違反當年入住協議同承諾；又認為有舍監嘅長者屋如低度照顧嘅長者院舍，成本更輕，質疑點解唔保留。

更多港聞

【明報專訊】香港有機資源中心噚日公布《香港消費者購買有機產品的行為研究》2021年調查結果，話有74.5%受訪者在過去一年曾購買有機食品，較... 詳情

【明報專訊】唔少機構都想方法推行低碳環保行動，恒生銀行同團體「低碳想創坊」就合作辦太陽能關懷計劃，計劃首個項目係喺沙田突破青年村安裝太陽能發... 詳情