【Emily】現任前任大律師公會執委 黃若鋒廖玉玲獲委任區院法官
[2022.07.01] 發表
【明報專訊】司法機構噚日宣布委任兩名大律師黃若鋒和廖玉玲為區域法院法官，分別喺7月11日、7月29日起生效。兩人曾多次獲委任為高院暫委副司法常務官及區院暫委法官，亦為現任及前任大律師公會執委。
Emily翻查資料，今年57歲嘅廖玉玲多年來參與唔少公職，曾為香港大律師公會執委會委員，做過新晉大律師委員會主席，現為地產代理監管局主席。
廖玉玲1987年喺港大修畢法學士，1989年喺倫敦國王學院取得法學碩士，2001年獲得大律師資格，主要處理各類民事訴訟。
至於54歲嘅黃若鋒，來自著名嘅Parkside Chambers(柏承大律師事務所)，成員中有多名知名法律界人士，包括今日上任嘅律政司長、香港大律師公會前主席林定國。
黃若鋒1998年喺香港獲大律師資格後，開始私人執業。佢亦係現任大律師公會執委會委員，估計佢做官之後，受法院條例所限，冇得留任執委。
更多港聞
【明報專訊】新一屆政府今日就職，新任副律政司長張國鈞噚日喺facebook上載約5分鐘嘅短片，告別立法會議員身分。佢喺片中帶大家參觀佢嘅辦公...
詳情
相關新聞
