【Emily】618山泥傾瀉50年 土力處搞展覽
[2022.06.01] 發表
【明報專訊】1972年6月18日，九龍秀茂坪同港島寶珊道分別發生嚴重山泥傾瀉，造成過百人死。今年係「六一八」山泥傾瀉事件50年，土木工程拓展署轄下土力工程處今個星期五(3日)至下星期一(6日)，會喺中環荷李活道大館舉辦專題展覽，畀公眾回顧兩宗山泥傾瀉，同介紹預防山泥傾瀉工作。
展覽喺大館F倉展室舉行，免費入場，場內有唔同活動，包括「4D山泥傾瀉虛擬實境體驗區」，畀市民以VR體驗喺秀茂坪臨時安置區內畀數百噸山泥覆蓋嘅情况；市民亦可參加「苔玉工作坊」，透過製作草球了解定期維修斜坡嘅重要。
展覽星期五(3日)開放時間為上午11點至下午3點、下午5點半至晚上8點；星期六、日(4、5日)由上午11點至晚上8點；星期一(6日)由上午11點至下午6點。
更多港聞
相關新聞
