【Emily】劉凱文中招 叫戰友保重
[2022.03.05] 發表
【明報專訊】民主派初選案被捕者之一、喺公立醫院急症室工作嘅護士劉凱文，前日快速測試呈陽性。劉凱文向Emily報平安，話精神尚可，有喉嚨痛同咳嗽，屋企有儲備紓緩病徵嘅藥物，亦做咗深喉唾液測試，正等候結果。至於染疫源頭，佢話雖然自己工作性質高危，不過𠵱家病毒「無處不在」，都唔肯定邊度感染；又話要短暫離開抗疫前線，叫各位戰友保重。
羅庭德疑染疫 辦公室消毒
北區區議員羅庭德噚日亦喺facebook話出現新冠病毒病徵，包括發燒、喉嚨痛、有痰、有鼻水，但朝早同中午做咗兩次快速抗原測試都係陰性。羅庭德喺軍地嘅辦事處內外，噚日都做咗霧化消毒，即日起亦會暫停開放，直至所有同事連續7日檢測結果呈陰性。羅庭德同Emily講，朝早出現病徵後，佢同家人已唔出門口，食過藥、瞓咗一覺，情况有好轉。佢話近兩星期每日都落區送物資畀區內確診者，而且新冠病毒嘅病徵佢幾乎中晒，相信可能真係中咗。
另外，政制及內地事務局副局長胡健民一名秘書，新冠病毒快速測試呈陽性，最近一次返工係前日(3日)，而胡健民每日做快速測試，結果都係陰性。
更多港聞
【明報專訊】第五波新冠疫情衝擊本港經濟。中電噚日宣布，再次推出「中小企延繳電費計劃」，餐飲業同零售業嘅中小企中電客戶，周一（7日）起可以到中...
詳情
相關新聞
