【Emily】財會諮詢 無人反對廢除提臨時動議
[2021.08.25] 發表
【明報專訊】立法會財委會喺建制派主導下打算修訂《財委會會議程序》，早前向委員諮詢第一批修訂，噚日有結果，41個委員中有39人回應，大部分支持所有建議，當中包括廢除喺財會提出臨時動議，即係俗稱「37A」條，有37個委員支持、兩人無意見。另外，修訂第13段訂明主席有權規管會議過程，包括有權就審議議程項目或議案設定時限，就有38人支持、1人無意見。
此外，修訂亦建議訂明程序，畀財委會轄下人事編制同工務小組委員會及財委會決定兩小組已通過嘅文件應否再喺財委會討論，有36人支持、1人唔支持、兩人無意見。
主席有權限時亦無人反對
財委會主席陳健波話𠵱家尚有第二批修訂正諮詢議員，等埋結果再開會一併處理。佢話早前有議員建議參與財委會都要限人數，但𠵱家唔會做，有議員(包括直選議員)嘈得好緊要，因為如果唔係委員就冇投票權，「人哋會覺得你講咩都冇用，都冇權」。
更多港聞
相關新聞
