【Emily】狄志遠爭提名約官員 齊食檸檬

[2021.08.14] 發表

【明報專訊】新思維狄志遠(Dick)報名參選社福界選委，爭取提名過程不斷「食檸檬」，佢噚日喺facebook發文回應外界質疑，話自己冇「阿爺」(中央政府)祝福，「如果我有阿爺祝福，拎提名唔洗(使)咁辛苦，食咁多次檸檬啦」。佢話好多社福機構唔敢畀提名，因為驚捲入政治漩渦，「你話發生緊咩事呢？」

除咗拎提名，阿Dick近日約見官員亦受挫。話說新思維上星期開記招，就過渡房屋提意見，阿Dick隨即打電話畀運輸及房屋局副局長蘇偉文辦公室，希望同官員交流意見，但本周收到回覆話蘇副局長好忙，唔得閒見面，叫新思維直接交文件畀意見。

新思維話深表遺憾，代主席黄俊瑯噚日發公開信畀蘇副局長，話官員仍活喺「官僚系統」中，蘇副局長一副「懶理」嘅模樣，「有意見，可隨時交過來，但怎樣處理，什麼時間處理，沒人知道」。黄對政府回應好失望，呼籲官員放下身段，面向社會，展現與民對話嘅誠意，盡快安排時間見面。

更多港聞

【明報專訊】民主派初選案多人還押，包括西貢區議會前主席鍾錦麟（Ben）。立法會前議員邵家臻噚日探佢，透露Ben目前喺赤柱單獨囚禁，囚倉較舊，... 詳情