【Emily】建制用fb做嘅投票:99.4%人撐DQ違誓區議員
【明報專訊】建制派近排成日搞網上民調推動某啲政策,但調查方法唔科學,唔係隨機抽樣,噚日又有一個。由建制派李月民同民建聯司徒駿軒發起嘅「元朗監察議員聯盟」公布「區議員宣誓逐個捉」網上投票結果,邀請到民記立法會議員梁志祥同周浩鼎做嘉賓,調查用facebook投票,聲稱有11,371人參加,話有超過99.4%投票者認為應該修訂《區議會條例》及《宣誓及聲明條例》,取消違反誓言區議員嘅資格。
聯盟又話調查顯示,有98.1%投票市民認為區議員收公帑、喺地區層面獲諮詢參與政策制訂係「公職人員」;99.5%投票者認為參選同接受區議員任命前要宣誓擁護《基本法》同效忠中華人民共和國香港特區。
佢哋根據上述結果下結論,話全國人大常委會應就《港區國安法》第六條所指嘅「公職」明確解釋至少包含區議員,同埋區議員參選同就職前要宣誓;政府應修例解除「反中亂港」、「搞獨」嘅區議員資格。