【Emily】打電話問隔離 衛署熱線日接600查詢
【明報專訊】武漢肺炎肆虐,社會人心惶惶,唔少人唔清楚自己會唔會係密切接觸者、使唔使隔離,就會打去衛生署24小時熱線查詢,結果熱線喺36日接逾2萬個call,即係平均每日600個。
患者去過嘅大廈嘅市民
投訴無人接聽電話
之前Emily聽過住喺有確診者去過嘅大廈嘅市民投訴,話打去衛生署熱線無人聽。而衛生署喺記者會講過,有職員接聽熱線,如果打唔通會有留言信箱。
咁究竟有幾多人打過條熱線?衛生署書面回答Emily,話自1月22日設立熱線2125 1122,截至星期三(2月26日)下晝4點,共接獲21,818個查詢。不過目前衛生署究竟有幾多人做緊密切接觸者嘅追蹤工作、幾多人負責接聽電話、至今接觸到幾多個確診者同密切接觸者、打過幾多次電話、有幾多個留言,就全部都無答。
36日接逾21,818個call
衛生署話,已經喺唔同服務單位靈活調配人手到防疫工作嘅前線崗位,會不時評估中心運作,確保熱線中心運作暢順。