【明報專訊】盛傳工聯會立法會議員麥美娟月前喺建制派與特首林鄭月娥喺禮賓府會面期間，爆粗鬧林太，麥美娟一直無承認或否認呢件事。其後經民聯張華峰(肥老闆)嘅錄音流出，一時形容爆粗者為「嗰個女仔」，之後先記起係麥美娟，又話爆粗地點係「迎賓館」、「特首屋企」。麥美娟噚日好鬼馬，提早寫咗聖誕卡，強調寫上自己全名，仲親自送畀肥老闆，話「怕會寄錯去迎賓館」。 被指爆粗鬧林鄭 親自送卡畀肥老闆 肥老闆當時同監警會主席梁定邦傾偈時爆響口，引發熱議，但麥美娟無嬲肥老闆，噚日並喺facebook上載兩人合照，話預祝各位聖誕快樂，仲加上標籤「香港人笑吓啦」、「我叫麥美娟」。佢話小學之後都冇寫過聖誕卡，「今年特別寫一張有我全名的送比(畀)張華峰議員，仲親自送去佢office，怕會寄錯去迎賓館！」 聖誕卡嘅內容好簡潔，上款係肥老闆全名，中間一句聖誕快樂，下款係麥美娟。麥美娟仲影咗肥老闆一個人拎住張卡嘅相，相信肥老闆以後會記得送卡畀佢「嗰個女仔」叫「麥美娟」㗎喇。
|
| |
| |
;){kind=small}
;)
