【明報專訊】今年香港嘅平安夜和聖誕節一啲都唔凍,氣溫徘徊喺20℃左右,自由黨黨魁鍾國斌(Felix)就去咗過白色聖誕,喺芬蘭嘅羅瓦涅米過節。佢噚日喺facebook上載咗滾雪地及同可愛小雪人合照嘅相(圖),好有聖誕氣氛。佢話一直夢想有個白色聖誕,「今年特別白。每個景都似Christmas card咁靚」。
Felix話,羅瓦涅米冬天每日得3、4個鐘有日光,大部分時間啲人喺黑暗中生活,不過當地人都好開心,又有禮,冇畀環境影響到。佢並話「Darkness is not that scary(黑暗都唔係咁可怕)」。
新民黨主席葉劉淑儀都趁立法會假期外遊,佢又上載咗一張美麗嘅海港相,叫大家估吓係咩地方。佢之後開估,話「大灣區我經常去。土耳其第一次!」