【明報專訊】立法會議員何君堯日前提出針對民主黨林卓廷嘅譴責動議，話阿廷行為不檢，違反《基本法》，喺7月21日參與「光復西環」，同日仲帶領黑衣人去元朗挑釁「白衣居民」。阿廷就反駁話自己當日根本無去過西環同上環一帶，質疑何君堯喺7．21後成為港人公敵，壓力好大，所以想透過誣衊佢去轉移視線。

阿廷：當日無去過西環

何君堯喺譴責動議上話林卓廷參與「光復西環」，同其他人一齊污損掛喺中聯辦嘅國徽；指控阿廷帶領黑衣人去元朗挑釁「白衣居民」，最終變成集體打鬥。阿廷就話當日根本無去過西環同上環一帶，「係佢(何君堯)幻想出嚟」，而7．21元朗白衣人無差別襲擊市民事件，何君堯「同黑幫握手，又鼓勵佢哋，搞到自己成為香港人公敵，我好明白佢壓力好大，但係佢咎由自取」；佢認為何君堯提出譴責動議係想轉移視線，「但反而等我有更多機會去講何君堯嘅角色，佢自取其辱」。

阿廷7．21喺網上見到有年輕人被打，打算去元朗保護市民，佢當日都被白衣人打到「嘴唇穿」，內外共縫18針。

阿廷同何君堯分別有報名參加區選，林卓廷參選嘅北區石湖墟，仲有新民黨孔永業和梁金成報名；何君堯參選嘅屯門樂翠有民主黨盧俊宇同蔣靖雯。