【明報專訊】民建聯立法會議員黃定光(象哥)過往不時被影到開會時瞓覺，噚日就鬧出小誤會，被公民黨郭家麒以為又瞓着，象哥忍唔住澄清：「黐線嘅你都，我好精神呀！」其後更向主持會議嘅街工梁耀忠發炮，問「瞓唔瞓覺都唔會阻礙會議進行㗎嘛？……咁即係我可以瞓啦吓嘛？」 話說噚日人力事務委員會開會選正、副主席，郭醫生想提名象哥做主席，「不過(象哥)瞓緊覺，唔知佢得唔得」；象哥隨即發炮指「黐線嘅你都，我好精神呀！」郭醫生隨即道歉：「因為你知黃議員呢，佢嘅常態係睡眠嘅，因為佢耷低頭，錯誤以為佢瞓覺。下次佢應該戙個牌，寫住『我不是睡眠』。」 Ann 姐勸二人打和 兩人又為象哥句「黐線」爭論一番，郭醫生認為屬冒犯，象哥反問「我話你黐黐哋，有冒犯咩？」梁耀忠就話不太禮貌，但未至於冒犯。呢個時候民建聯蔣麗芸(Ann 姐)突然做和事老，「佢兩個一筆勾銷算啦好嘛？繼續餘下工作」。 阿忠亦想打圓場，佢回應話瞓唔瞓覺，阻礙唔到會議進行都無問題，話唔好針對同事喺座位上嘅行為；象哥就忍唔住再發炮：「瞓唔瞓覺都唔會阻礙會議進行㗎嘛，咁即係我可以瞓啦吓嘛？」阿忠都係話影響唔到會議就得啦。
|
| |
| |
;){kind=small}
;){kind=small}
;)
