【明報專訊】反修例運動嘅支持者，表達訴求嘅方法層出不窮，連攞優惠都不忘講口號。話說麥當勞噚日喺facebook專頁出咗個新優惠，只要留言「再3回味」，即送電子優惠券，只需3元就可以買到蘋果批或香芋批(圖二)。個post開咗7個鐘就有逾萬個留言，有人留言「再三回味 光復香港 時代革命 五大訴求 缺一不可 願榮光歸香港」，而專頁管理員都照留言：「$3蘋果批∕香芋批優惠券已經Inbox咗俾你?快啲去睇吓啦！」

網民貼批警暴歌詞 未獲回覆

喺呢個post下面好多人照辦煮碗，跟隊留言「再三回味 光復香港」，亦有提及唔同訴求，包括成立獨立調查委員會，有人話「打倒暴徒」，亦有人希望「香港一定會更加好」。基本上所有獨立嘅留言，都獲回覆送出優惠券。有人甚至留言貼咗成首歌嘅歌詞，內容係網民創作批評警暴嘅歌曲《肥媽有話兒》，呼籲「唔好害人哋啲仔女啦」，不過呢個留言就未獲回覆。