【明報專訊】有「金刀梁」之稱嘅醫管局前主席梁智鴻接受賽馬會刊物《駿步人生》訪問，年屆80歲嘅佢仍未言退休，繼續診症、做手術，「招牌造型」三件頭西裝同中間分界髮型更係「幾十年如一日」。佢喺訪問中話自己唔係姿整，但肯定愛齊整，咁多年來連一條牛仔褲都無，仲自爆年少時曾經為頭髮煩惱。

無牛仔褲 頭髮自細「動L」

十幾歲仔正值最注意儀容嘅年紀，但無論梁智鴻將頭髮向左梳定向右梳，啲頭髮都係會彈起，試過用髮蠟或夜晚用網套住，結果第二朝起身都一樣，最慘係7兄弟姊妹中只得佢有呢個煩惱，搞到佢覺得自己好陰功。𠵱家佢當然唔介意，但最驚係變光頭。

梁智鴻爸爸喺香港仔行醫，當年佢會跟阿爸阿媽返診所，有時要幫手執藥、溝藥水，充當診所嘅「藥劑師」。自小立志做醫生嘅梁智鴻仲為此轉校，喺聖若瑟讀到最後一年，轉到有生物學課程嘅皇仁書院，後來考入香港大學醫學院，於1962年畢業。1970年代初，梁智鴻去美國進修時有機會留低教書，有機會攞到美國公民資格，但佢話當時想服務香港，諗番個決定都係啱。