【明報專訊】路透社早前公開特首林鄭月娥8月底與商界閉門會面嘅錄音，林太透露政府曾邀8間國際公關(PR)公司協助宣傳工作，但就食檸檬。Emily噚日收到一份政府新聞處發出有關對外宣傳策略建議嘅招標文件，背景開宗明義話近月示威令香港受到國際注意，特區形象受到影響，政府希望拎建議改善海外主要市場對香港嘅負面看法，及維持對香港嘅信心，強調香港與區內其他城市不同嘅優勢同特色，帶出「一國兩制」嘅成功。
目標市場係亞太區北美歐洲
呢次招標已喺8月15日截止，Emily向新聞處查詢呢份文件係咪真確、最後有無公司入標，獲回覆「政府新聞處曾以報價形式採購對外宣傳服務。由於沒有供應商在截止日期前提交報價，有關的採購程序已經失效」。
招標文件話，香港嘅管治同一國兩制成為關注焦點，亦引起人哋對香港作為全球商業和金融中心嘅定位擔憂，及以法治為基礎嘅穩定環境；有人擔心抗議活動可能會影響商務旅行者、展覽和遊客嘅人身安全。文件話，今次目標市場係亞太地區、北美及歐洲；希望供應商提供嘅服務範圍包括：評估修訂《逃犯條例》和其後發生嘅示威對香港嘅海外形象影響等。
;)
