【明報專訊】青年發展委員會副主席劉鳴煒幾年前創辦咗青年智庫MWYO，噚日趁住MWYO活動開始前，Emily與幾個行家就同佢傾咗幾句，劉鳴煒話，推行青年工作或教育唔可以單靠政府，「由下而上」比「由上而下」嘅做法更有效。對於政府係咪應該「由下而上」解決現時社會問題，劉鳴煒話點樣解決，大家都仲搵緊答案，但任何嘢「由下而上」推動，過程都會得到廣泛人士參與。佢又話，無論任何政見，都無人想香港衰，大家都係想香港好；MWYO都正籌備緊唔少活動。

有行家並追問劉鳴煒點睇香港首富李嘉誠話希望執政者對未來主人翁網開一面，劉鳴煒就話自己趕住去活動，亦密切留意緊事態發展，Emily希望下次可以聽到佢分享多啲佢嘅睇法。