【明報專訊】警方上周六喺大埔墟火車站內以警棍擊打一名學生、導致佢頭部流血送院，事件引起關注，大埔民主派區議員噚日喺區議會社會服務委員會上，提出臨時動議「譴責警方7/9於大埔墟港鐵站毆打及拘捕大埔區手無寸鐵的中學生及市民」。但喺多名建制派議員離席下，最終會議因法定人數不足而流會，未有表決動議，離席者包括大埔區議會主席、民建聯黃碧嬌。 主席黃碧嬌都走：約咗人 提出動議嘅新民主同盟周玹瑋批評建制派做法荒謬，「反對又唔夠膽，棄權又唔夠膽，只能夠選擇逃走，去逃避呢個議案」，斥建制派集體離席係逃避表態、導致流會。和議議案嘅獨立劉勇威就批評建制派「真係好可恥」、成日搞流會，「集體消失有之、霸道中斷有之，咁大埔民生事務唔使理啦，地區撥款唔使理啦」。 離席嘅黃碧嬌就向Emily講，佢約咗人12點開會，而有關動議未有載列喺議程上，唔能夠話佢因為有人提動議而避席；佢話開會期間冇開電話，直至開完會先發現區議會流會。黃碧嬌又質疑提出動議係「逼出席會議人士表態」，相信有區議員離席係因為對此不滿；又話件事全港關注，警方調查緊，受傷學生身在醫院，「點解要逼人討論？進入司法程序，唔係留番法庭、警方去調查㗎咩？」
|
| |
| |
;){kind=small}
;)
