【明報專訊】記者近日喺示威現場除咗面對警員以胡椒噴霧、催淚彈等攻擊，仲要面對撐警者指控係「假記者」。話說近日有新聞片段喺撐警者之間流傳，質疑有身穿黑衣嘅「暴徒」換上記者背心，更指控拍攝影片嘅有線新聞隨即移開鏡頭，「試圖隱瞞事實」。
now新聞台澄清，身穿該台反光衣嘅男子，證實係該台工程人員，當時係稍事休息後，著番背心繼續做嘢。
稍事休息後 著番背心工作
被指控移開鏡頭嘅有線新聞就上載片段澄清，話該名男子一度除低記者背心離開現場，數分鐘後返回示威現場，並喺其他記者協助下著番背心；而調動鏡頭係為咗準備新聞台下一節直播。有線新聞強調「從不刻意迴避事實」，對於有人完全不作查證，肆意發放虛假消息，毫無根據攻擊有線嘅專業操守，「本台深表遺憾」。
有線：調動鏡頭係為下一節直播
事實上，近日經常有針對「假記者」嘅指控，包括有建制派中人提出要由警方發記者證，亦有人質疑記協發出記者證嘅準則。其後記協就分別澄清，話由政府、警方發記者證嘅國家包括內地、朝鮮等「全球最冇新聞自由國家」；仲強調只有以新聞工作為主要收入來源嘅人，先能夠申請作為記協正式會員以及記者證。
;)
