【明報專訊】Emily與同事近排都忙到有氣無埞唞，有朋友見Emily不斷OT咁辛苦，噚日就好心send咗份工過嚟畀大家睇睇。

原來有間中介幫一個位於灣仔嘅政府「武裝部隊」(armed forces)出廣告，請社交媒體專員同埋專業寫手，人工37,000元起，講明「要有青少年觸覺」，但就冇講明係邊個部門。

消息稱舊年都請過 非新鮮事

Emily望晒公務員事務局同各大紀律部隊網頁，搵極都搵唔到相關招聘廣告，於是打去中介度問吓，接線嘅中介梁小姐話係幫警方少年警訊請人，主力幫手管理facebook同埋Instagram兩個平台專頁，以及做一啲內部宣傳，不過唔知點解成個廣告都唔講明係警方請人。

點解今次警方請人咁神秘呢？Emily問咗警界朋友仔，佢就話少年警訊想請3個人，主力支援幾個阿sir同madam嘅推廣工作，所以喺外面搵中介買咗個管理社交平台服務，所以應徵者唔係直接受聘於警方，而係受聘於嗰間中介公司，舊年都曾經請過，唔係咩新鮮事。

近排警民關係都好緊張，警方要同班後生仔connect，真係幾考工夫。Emily想問吓警方回應，至截稿時未獲回覆。