【明報專訊】話說非洲豬瘟襲港，上水屠房要關閉，搞到全港都無新鮮豬牛羊賣，除咗市民大呻無鮮肉食之外，肉檔嘅老闆都首當其衝大叫救命，無晒生意嘛，呢幾日收入凍過水。不過，窮則變，變則通，其實無豬肉賣使乜驚喎，喺大埔嘅大光里，就有豬肉檔轉賣底衫褲！ Emily噚日去到大光里10至12號地下八卦一下，嗰度分開做A、B舖，一邊賣豬、一邊賣魚。喺紅色嘅燈光映照之下，一條條底褲，就好似一塊塊豬肉咁，掛喺豬肉架上。肉枱前面，另有一桌底褲同胸圍，堆積如山，攤晒喺度任君選擇，畫面相當有趣，真係唔買都值得埋去睇吓。 街坊：類似檔成日「攝」位 有街坊話大約兩日前，估計因為無豬肉賣，呢個豬肉檔一直無開，跟住開始有人賣內衣褲。呢批內衣褲價錢約5到20蚊不等，有時都有成4、5個人一齊揀心頭好，而且真係有人買㗎。 街坊又話，成日都有類似賣內衣褲嘅檔，會「攝」去呢啲吉舖度做生意。 此情此景究竟會維持幾耐？Emily問過職員，佢哋都話唔知會做到幾時，如果大家想去睇吓呢個奇景，就要把握時機喇！
|
| |
| |
;){kind=small}
;)
