【明報專訊】立法會長三角考察團噚日轉到杭州訪問，第一站先去參觀「市民之家」。呢個市民之家其實係政府大樓，可以畀市民一站式申請、辦理多項政府服務，Emily去到都大開眼界，見好多嘢都可以自助辦理。中心設有櫃台辦理婚姻登記，隔籬就係離婚登記，影婚姻證件相仲可以自助拍攝，即影即有。 考察團團員新民黨容海恩上年同袁彌昌結咗婚，佢噚日分別同工聯會麥美娟、民建聯葛珮帆(EQ)自助影「結婚相」，享「齊人之福」。麥美娟上載咗張相去facebook，特別標籤咗袁彌昌，話「人妻請我影結婚相」、 「人夫注意」。 自助避孕套機 嘟身分證派10個 EQ話港人唔會制 自助嘅設施唔只係影結婚相，仲有一部名叫「計劃生育藥具免費發放機」，藥具係啲咩？原來係避孕套。操作呢部機要掃一掃身分證，先可以選擇一包10個嘅安全套。香港可唔可以喺政府服務點放番一部咁嘅機器，方便大家呢？EQ就話香港𠵱家要鼓勵生育，而且要市民記錄身分證先可取套，香港人咁注重私隱，多數唔會肯制喇。 Emily喺考察團觀察到有個團友原來係「龍友」，喺行家影唔到相時出手幫忙，佢就係財經事務及庫務局長劉怡翔。佢同Emily講，平時都有影開相，但今次考察團就無咩機會用大機，而考察西湖個戶外大型表演時，就用手機影吓相。
|
| |
| |
;){kind=small}
;){kind=small}
;)
