財爺舌戰毛姨姨 互斥顛倒黑白是非

財爺舌戰毛姨姨互斥顛倒黑白是非

[2019.03.01] 發表

【明報專訊】財政司長陳茂波噚日去立法會簡報《財政預算案》，其間同議會陣線議員范國威、毛孟靜舌劍唇槍，先後批評兩人「聲大唔代表有道理」、「斯文陰聲細氣但顛倒是非」，火花不少。

范國威：係咪買「死場」?

話說范國威會上質疑，預算案提出用200億元買60個單位興建社福設施，問到財爺係咪要買「劏場」、「死場」，甚至直斥陳茂波「你因為劏房聲名躍起，𠵱家就用公帑利益輸送去買劏場」。佢又問政府要買咩「死場」，到底係成為全球實景喪屍館嘅荃灣海濱廣場，定係拍過《生化壽屍》、連議員陳志全都有份演出嘅北角新時代廣場。

陳茂波之後反唇相譏，指范國威「聲大唔代表有道理，你講嘅嘢顛倒是非，混淆視聽」，強調如果勞工及福利局長羅致光要買物業，一定會去立法會諮詢議員。

毛孟靜其後發言時話，大聲未必一定有道理，「但即使溫柔妥貼細聲講嘢，一樣可以顛倒黑白」，批評預算案予人感覺國策為先，「大灣區先行，咩都係創科」，質疑點解「進貢」大灣區公帑仲多過紓困措施。

財爺不甘示弱，批評「毛孟靜就演繹斯文陰聲細氣但顛倒是非」，強調整份預算案只得兩段提到大灣區，裏面有相當篇幅講創科，全因創科浪潮不可阻擋，又強調創科產業面向全球，大灣區係好嘅市場。