【明報專訊】今年係中共建國70周年，亦係香港中華廠商聯合會(廠商會)85周年，會長吳宏斌及一班領導層噚日齊齊宣布，廠商會會舉辦一連串慶祝活動，包括電競比賽。

「老字號」廠商會關心電競，可謂追上潮流，吳會長話電競近年出現爆發性增長，全球對呢個新興產業趨之若鶩，料全球市場潛力數以十億港元計，2022年杭州亞運更首將電競列比賽項目。為鼓勵業界把握商機，廠商會將冠名贊助由香港電競總會主辦嘅全港公開電競比賽。吳會長又透露廠商會計劃年底訪京，拜訪中央官員，反映香港工商界關心嘅議題，並匯報廠商會工作。

大灣區規劃即將推出，吳宏斌話廠商會將委託嶺南大學做有關大灣區內港資製造業經營情况、對灣區貢獻以及實現轉型升級發展策略嘅顧問研究，希望年中展開，今年內發表。廠商會1934年成立，有好多珍貴歷史資料，佢哋正與樹仁大學歷史系、教育大學同理工大學嘅師生合作，推出歷史檔案系統，將廠商會歷史、工作成果等數碼化放喺電子平台，仲搵咗歷史學家丁新豹做研究小組嘅顧問。