葛珮帆迪拜獻人生第一次

民建聯立法會議員葛珮帆（下）喺迪拜跳傘期間，不斷擺出各種手勢，包括豎起拇指、心心、飛吻等，睇落相當興奮。（葛珮帆提供）

【明報專訊】唔少政界人士都趁聖誕假期外遊，民建聯立法會議員葛珮帆(EQ)就同家人「三代同堂」，喺迪拜玩得相當開心。EQ此行仲試咗人生第一次跳傘，佢形容呢次經歷好興奮又緊張，由1.3萬呎高空跳出飛機一刻有啲驚，但急墮嘅60秒非常刺激，「好大風，吹到面都變晒形」；降落傘張開後，佢就有5分鐘時間喺高空欣賞迪拜景色，形容風景好靚、好享受。

1.3萬呎高空跳傘

由EQ上載facebook嘅片段可見，佢跳出飛機一刻面容有啲僵硬，但之後不斷做出飛吻、心心等手勢，睇落相當享受。EQ話之前喺新西蘭大橋玩笨豬跳，但過往預約跳傘就因為天氣太差而取消，今次終於成功。佢仲話好鍾意跳傘，如果有時間好想正式學，而最驚嚇都係笨豬跳咁話。

除咗跳傘，EQ喺迪拜仲去咗3個主題樂園，包括喺水上樂園玩超高滑水梯，又玩咗全球最快嘅過山車，同埋一家人喺沙漠遊車河，真係玩盡水、陸、空呀。