中聯辦元旦開微信公眾號

【明報專訊】新年新開始，中聯辦網站近日就發稿話，聽日元旦日香港中聯辦嘅官方微信公眾號會正式推出，形容呢個係中聯辦信息公開嘅重要平台，係中聯辦「門常開、人常在、事常辦」嘅「e服務」平台。中聯辦話，微信公眾號上線後，佢哋將形成「一網一微」嘅官方新媒體傳播形態，話會力求「權威發布，貼心表達」。

話力求「權威發布，貼心表達」

中聯辦話會透過微信嘅官網、資訊、服務3個欄目，宣傳介紹一國兩制方針同中央對港政策，聚焦中央、香港同中聯辦嘅重要信息，介紹國家同香港發展成就以及兩地交流合作成果等，並為市民提供相關網上辦事服務。

Emily睇過中聯辦微信號，入面有3項服務，包括內地來港學生報到、中資企業報到登記以及香港記者返內地採訪嘅申請，不過暫時仲未可以透過微信辦理，撳入去只係連結中聯辦網站嘅相關資料。

香港人用微信似乎唔算普及，唔知中聯辦日後會唔會為咗拉近同市民嘅接觸，開埋facebook專頁、instagram嘅帳號呢？