【明報專訊】馮檢基上月退出民協,「後馮檢基年代」民協嘅全男班領導層話要帶出新風氣,用新手法全力「做地區」。民協主席施德來噚日同傳媒茶敘,介紹一班年輕嘅社區主任,話民協下年區選會有意派出20人集中喺老巢深水埗、屯門同黃大仙出戰,包括12個爭取連任嘅區議員,佢講到明今次壓力都好大,因為建制派區區都派人對戰。
至於點搞新風氣,施德來話民協有自己特色,暫時無計劃同其他政黨合併,但想同其他泛民喺區政上做聯盟,例如關注區議會撥款、增選委員等問題。副主席何啟明話,民協會保留長者茶敘、蛇宴等傳統方式,而為接觸新一代選民,佢哋會積極搞facebook、WhatsApp宣傳。馮檢基上屆區選喺麗閣選區輸咗畀工聯會小花陳穎欣,𠵱家喺麗閣服務緊嘅社區主任李炯話,基哥喺區內被唔少年長選民睇成係「一家人」,基哥嗰套仲使得。
民協秘書長黃虹銘透露,內部傾緊修改會章,令會章精簡同現代化,佢話未來希望討論民協係咪可以實行「黨政分家」。民協有90名成員,未來佢哋會繼續招募新人,例如透過暑期實習計劃招募大專生參與。