回收膠樽變身藝術品
[2018.06.30] 發表
【明報專訊】維他奶邀請咗200名嚟自屯門同元朗區嘅小學生將回收返嚟嘅乾淨膠樽塗上顏色，變身成藝術品，噚日仲搞咗個展覽。其中一個展區「窗外的世界——日」入面嘅作品，就將剪裁好嘅膠樽，黐喺一塊透明塑膠板(圖)，再用燈光將圖形投射上牆，睇到相入面幾個小朋友眼定定望住件作品，就知件藝術品唔簡單喇。另一展區就將上咗色嘅膠樽串連喺LED燈管上面，喺黑暗房間營造出霓虹嘅閃燈效果。「童．塑．光影」創藝展覽今日早上10時至下午5時，喺香港藝術中心5樓包氏畫廊免費開放，仲有工作坊，即場用回收得嚟嘅塑膠物料整手工藝品。
更多港聞
相關新聞
