【明報專訊】特首林鄭月娥捐錢畀民主黨一事引起熱議，有人關注林太面對其他政黨究竟會係一視同仁定親疏有別？暫時睇「大和解」一幕未有機會重演，公民黨下個月舉行黨慶兼籌款晚宴，但唔會請任何政府官員，所以林太捐錢畀泛民暫時無續集。 公民黨黨魁楊岳橋(AY)話，希望可以將晚宴焦點集中喺公民社會同路人，如果請官員，焦點就一定會去咗啲官員度，所以最終決定唔請官員嘞。至於當晚會有乜嘢表演項目，AY就賣關子唔透露住。 而自由黨下個月16號亦會舉辦成立25周年酒會，雖然會請林鄭月娥等官員做嘉賓，但就唔會有林太捐錢一幕喇，皆因一向有富貴黨之稱嘅自由黨，當日酒會係唔會有籌款環節。 另一方面，林太捐錢畀民主黨，令到民主黨被質疑係咪想做「忠誠反對派」。有黨員呻𠵱家要拆彈向支持者交代，諗緊計點樣處理嗰3萬蚊，避免日後選舉時民主黨會被狙擊話「收林鄭錢」。黨內有意見認為可以借花敬佛，將3萬蚊捐畀慈善組織，民主黨噚晚就開中委會討論點樣處理呢筆錢，唔知最終會唔會捐錢呢？
|
| |
| |
;)
